Home / Pêşgotin / Civaka Ku Baskên Jinê Rûçikandin

Civaka Ku Baskên Jinê Rûçikandin

Di vekolandin û raberkirina dîroka dûr û nêz a merivanîyê de, her dem sitembarîya jinê û jankêşîya wê ji meriv re eyan dibe. Heta îroj jî meriv xweş tê dibîne ku jin hîn wekî alîyê qels ê civakê tê dîtin û neheqî her û her li hemberî hebûna wê ya merivane û kesayetîya wê ya taybet didome. Vê hişmendîya çewt her gav kambaxî û bipaşveçûn bi xwe re anîne û civak di nava bipaşverûtîyeke xerab de niqumandiye.

Di hejmara duwazdehan a Kovara Sormeyê de, me -desteya sernivîskarîya her du beşan- xwest vê mijara girîng tev bidin û wê ji çend alîyan şirove bikin. Bi raberkirina dosyaya sereke ya vê hejmarê de, me xwestibû ku em giranîyê bidin mijara “Jin û Çand”ê, armanc jî ew bû ku têkilîya di navbera jin, çand û bipêşvebirina hişmendîya civakê de were belîkirin, çunku çand -nemaze wêje- wekî eynika civakê tê dîtin û beşdarîya jinê ya di warê nivîsîna çandî/wêjeyî de dikare asta têgihaştina civakê, rewşa nasnameya jinê ya civakî û asta danûstandina civakê li gel jinê bide dîyarkirin.

Di vê hejmara Sormeyê de, wekî yekem car, me xala hevpeyvînê derbasî sîstema amadekirina hejmarê kir, ew jî bi hêvîya dewlemendkirin û têrkirina dosyayên Sormeyê ji hêla hizirî û çandî ve. Hevpeyvîna me ya vê carê (hevpeyvîna pêşîn) li gel nivîskara jin Yildiz Çakar e. Di vê hevpeyvînê de, birêz Yildiz Çakar gelek alîyên nakok ên nivîskarîya jinê ji me re belî kirine û destê xwe danîye ser birîna kûr a civaka ku nivîskarîya jinê wekî derdekî giran û karekî derî adetan dibîne.

Di nivîsa li jêr serenavê “Jin… Ji Tarîtîya Bindestîyê Ber Bi Pencereya Xwevejîyandinê Ve”, nivîskar Xunav Kano me di gola neheqîya civakî ya li hemberî jinê de gut dike û hêlên metirsîdar ên danûstandina li gel jinê ji me re ronî dike.

Di gotara li jêr serenavê “Jin, Şoreşa Jîyan û Civakê ye” de, nivîskar Xoşman Qado giranîyê dide ravekirina rewşa jina Kurd li Rojavayê Kurdistanê û Sûrîyeyê û sedemên bipêşveçûn û çakbûna rewşa wê di van her pênc salên dawî de ji me re zelal dike.

Di beşê nivîsên wergerandî de, du gotar û lêkolînên hêja yên der barê hêçan û serbihurîyên jinên Rojavayê de ji hêla Bihar Mirad ve ji zimanê Îngilîzî hatine wergerandin.

Wekî din, beşê duyem ê gotara dirêj a nivîskar Kakşar Oremar a bi navê “Heftê Salên Komarekê û Berdewamîya Dozekê” cîyê xwe di nava nivîsên kovarê de girtiye û gelek milên veşartî û nenas ên damezirandin û rûxandina komara sêwî ya Kurdistanê eşkere kirine.

Sormey, bi vê dosyaya xwe ya girêdayî rewşa jinê û rola wê ya çandî hewl daye ku hêz û pêwîstîya jinê ya civakî belî bike û dîyar bike ku êdî heyama jina başkrûçikandî qedîyaye û îroj roja vejîyandina rola dîrokî û sereke ya jinê ye.

Sernivîskarîya Beşê Kurdî yê Kovara Sormeyê

Leave a Reply

Your email address will not be published. Required fields are marked *